បរិញ្ញាបត្រនីតិសាស្ត្រ

មហាវិទ្យាល័យនីតិសាស្រ្ត មានចក្ខុវិស័យក្លាយជាមហាវិទ្យាល័យឈានមុខគេក្នុងការអប់រំលើវិស័យច្បាប់ ប្រកបដោយគុណភាពខ្ពស់ តាមរយៈការបណ្តុះបណ្តាលនិស្សិតច្បាប់ឱ្យក្លាយជាអ្នកច្បាប់ដ៏ចំណាន មានសមត្ថភាពខ្ពស់ ក្នុងក្របខ័ណ្ឌជាតិ តំបន់ និង អន្តរជាតិ ព្រមទាំងចូលរួមលើកកម្ពស់កិត្យានុភាពជាតិក្នុងវិស័យអប់រំផ្នែកនីតិសាស្រ្ត។

ដើម្បីសម្រេចបាននូវចក្ខុវិស័យខាងលើនេះ មហាវិទ្យាល័យនីតិសាស្រ្តបានកំណត់នូវបេសកកម្មដូចតទៅ៖

• ផ្តល់ឱ្យនិស្សិតនូវចំណេះដឹង ជំនាញ សីលធម៌វិជ្ជាជីវៈ ក្នុងវិស័យច្បាប់ ដើម្បីបម្រើតម្រូវការនៃទីផ្សារការងារ និងសង្គម។
• ជម្រុញ និង លើកទឹកចិត្តដល់ការសិក្សាស្រាវជ្រាវផ្នែកច្បាប់ ការពិភាក្សា ផ្លាស់ប្តូរគំនិត និងទស្សនគតិយុត្ត។
• ធ្វើការសហការជាមួយផ្នែកពាក់ព័ន្ធផ្សេងៗ ដើម្បីផ្តល់ឱកាសឱ្យនិស្សិតទទួលបាននូវបទពិសោធន៍ថ្មីៗជាបន្ថែមទៀត នៅក្នុងវិស័យច្បាប់។
• ជម្រុញឱ្យនិស្សិតសិក្សារៀនសូត្រពីអន្តរវប្បធម៌ និង ចូលរួមក្នុងកិច្ចការសហគមន៍។

មហាវិទ្យាល័យនីតិសាស្រ្តផ្តល់ជូននូវកម្មវិធីសិក្សាដែលមានគុណភាពខ្ពស់ ស្របតាមតម្រូវការទីផ្សារការងារសម្រាប់និស្សិតច្បាប់។ កម្មវិធីសិក្សាថ្នាក់បរិញ្ញាបត្រនីតិសាស្រ្តត្រូវបានបង្កើតឡើង ដោយរួមបញ្ចូលគ្នានូវការផ្តល់ចំណេះដឹងផ្នែកទ្រឹស្តី និង បទពិសោធន៍អនុវត្តជាក់ស្តែង ព្រមទាំងការហ្វឹកហាត់ទៅលើកិច្ចការសរសេរ ការស្រាវជ្រាវ និង ការវិភាគដោះស្រាយបញ្ហាគតិយុត្ត។

បន្ទាប់ពីបញ្ចប់ការសិក្សាថ្នាក់បរិញ្ញាបត្រនីតិសាស្រ្ត និស្សិតនឹងអាចទទួលបាន ៖

ក.ចំណេះដឹង

• ពន្យល់គោលការណ៍ និង វិធានច្បាប់ ។
• បង្កើតកិច្ចគតិយុត្តក្នុងវិស័យសាធារណៈ និង ឯកជន ។

ខ.ជំនាញក្នុងការគិត

• វិភាគបញ្ហាសង្គម ដោយផ្សារភ្ជាប់ទៅនឹងវិធានច្បាប់ដែលពាក់ព័ន្ធ ដើម្បីរកដំណោះស្រាយផ្លូវច្បាប់ ។
• ផ្តល់បំណកស្រាយតាមបែបគតិយុត្តទៅលើបញ្ញត្តិច្បាប់ សេចក្តីសម្រេចរដ្ឋបាល និង សេចក្តីសម្រេចតុលាការ ។

គ.ជំនាញទំនាក់ទំទងអន្តរបុគ្គល និងការទទួលខុសត្រូវ

• ធ្វើការងារជាលក្ខណៈបុគ្គល និង ជាក្រុម ។
• បំពេញវិជ្ជាជីវៈប្រកបដោយសីលធម៌វិជ្ជាជីវៈ និង ការទទួលខុសត្រូវខ្ពស់ ។

ឃ.ជំនាញលេខនព្វន្ត ព័ត៌មានវិទ្យានិងទំនាក់ទំទង

• គណនារកចំនួននៃសិទិ្ធនិងកាតព្វកិច្ចពាក់ព័ន្ធ ដូចជាតម្លៃទឹកប្រាក់ពន្ធលើពាក្យបណ្តឹងតម្លៃនៃចំណែកមរតកឬភាគបម្រុងជាដើម។
• ប្រើប្រាស់កុំព្យូទ័រដើម្បីបំពេញការងារក្នុងវិជ្ជាជីវៈរបស់ខ្លួន។

ក្រោយពីបានបញ្ចប់ដោយជោគជ័យក្នុងកម្មវិធីសិក្សាថ្នាក់បរិញ្ញាបត្រនីតិសាស្រ្ត និស្សិតជ័យលាភីអាចមានឱកាសការងារដូចខាងក្រោម ៖

• ចៅក្រម ព្រះរាជអាជ្ញា
• មេធាវី
• សារការី
• អាជ្ញាសាលា
• ក្រឡាបញ្ជី
• មជ្ឈត្តករ
• មន្រ្តីនគរបាលយុត្តិធម៌
• មន្រ្តីរាជការ ថ្នាក់ដឹកនាំ នៅតាមបណ្តាក្រសួងស្ថាប័នផ្សេងៗ
• អ្នកពិគ្រោះយោបល់ផ្លូវច្បាប់ អ្នកគ្រប់គ្រងធនធានមនុស្ស នៅតាមបណ្តាស្ថាប័នរដ្ឋ និង ឯកជន ។ល។